مشكله الصراحه..سعيدان ارهاابي....

سعيدان ارهابي مغتصب!!
هلاوي شبابيز( جمع صبايا وشباب)

سمعوا سالفة سعيدان


انا يامحاتسيكم من قبل ما طلع على الدنيا الله مير يسلمها كان جدي الله يصلحه ماسك ابوي يومه صغير ولاقطه مع كتوفه ويهزهزه ويقوله ياولدي ياولدي انا شفت حلم قال ابوي وش اسوي لك؟! رد جدي قال هالحلم فيك يمال الثول والصمرقع والزكمه(منول الزكمه مرض يسفك امم!) وانا ابوك حلمت انك راكبن تيس وتركظ انت وياه على طريق الملك فهد ووراك وحدتن خير اللهم اجعله خير راكبه عنز وتركضون وانتم مستانسين تطربزون(الطربزه هي الركض في معجم كيف الحال!)قاله ابوي وش تفسيره يابيي(كانت علاقتهم قويه قبل !) ..قال هذا والله العالم وانا بوك تبي تتزوج وحدتن مزيونه بس لك عليها شوي في العقل وبيجيكم ولد فلته وداهيه بسم الله عليه لا انضله وهو في ظهرك
وطبعا
الولد الداهيه والفلته على قولت جدي الله يفك أسره! هو:
انا! بسم الله على قليبي
فعلا تزوج ابوي امي(اجل تزوج جدك؟!) وعاشو في هناء وسعاده وعلى ذمة شهود عيان يقولون انا ابوي متن عقب هالزواج وصار وسيع صدر ونكوتي وابشركم ترك الشيشه وصار يحشش!! المهم.. ,وبعد مده من الزمن لا احد يدري ماذا حدث خلالها شرفت انا على الدنيا!!
بديت حياتي وانا اتعرض دايمن لمواقف تزيد فيني الثقه بالنفس
وتخليني ماخذن مقلب في نفسي الله لا يعطيها عافيه
وانا عمري خمس سنوات كان ابوي يخليني اقلد مشيت امي عند الرجاجيل وهم يستانسون عليها(الله مازين هالأبو)
وهذا ريّش بي وخلاني مصدق عمري ..كبرت شوي وصار عندي ربع ودايمن اخف بهم واخذ دراهمهم واقوله بنسوي شركه مقاولات وبنبيع فيها ببسي وميرندا وتيم(على ايامه)..واروح اشتري تتن وابيعه على دشير حارتنا بالحبه واكسب ذهب من وراها..بس عقب ماقلو لي بزران مثلي انه مكسب حرام تركته وقلت كلش الاالدين(اخس يهالبزر!)

ومواقف كثيره خلتني اثق بنفسي ومحد قدي في هالدنيا واللي في راسي بسويه وماعندي فحد!
الين صارت لي هالقصه...
8
ترى كل هاللي قريتوه (مقدمه)! <<لحد يعصب في الماصله الله لايعوق بشر!!

القصه:
كنت نازلن من الدرجه وانا ركض من زود ساعة الصدر وخشتي منشقه حتى بالمارية شغالتنا ناقده علي ! ورحت لمي الله يحفظها ويهديها والقاها تاكل كراث وتناظر كبتن ماجد وادخل عليها واقول اسعدتي صباحا يا اماه وردت علي قالت اهلا بك يافرنندو
وتاخذ الصامولي وتزين لي سندويش كراث وانا اذا شفت بس شوف سندويش كرات انهبل وتدلي سعابيلي تقوطر واحيانا ارقص. واخذها من يدي امي الكريمه واكلها وانا في انشكاح لا يعلم به الا الله ..عاد استغليت هالانبساط اللي في امي يوم شافتني اكل سندويش كراث واقول لها اني بسافر لأبها(البحرين) عشان اقضي الصيفيه,,وتقولي هو وانا امك وش وله هالتعب عندك مزرعة خالك ياله من فضلك ماهنا فرق عن ابها ابد اللهم انها مافيها جيازنا!
قلت في نفسي انا هالحين بروح لللبحرين وتوهق بمزرعة خالي هاللي مافيها الا نخلتين وبنقالي ضروسه صفر
واقولها لا خلاص انا مواعد رفيزي حمزه وحاجزين في الخطوط. مانقدر
قالت لي براحتك وانا امك بس ماودي بهالخساير لو تجمع عشان تعرس ترى ازين
عطيتها كم كلمه حافضهن عن الزواج ومشيت

واستعديت للسفر

وفي الصباح الباتسر لبست ذاك الجنز السماوي, ومافيه الا تسحيب من الفجر الين الساعة تسع وانا وياه تسحيب الين انطبق شوي يعني غطى اللي لازم نغطيه والباقي مثل السر تغطيه الفنيله مهيب مشكله
طلعت في الشارع ادور حمزه ولد حارتنا بس مالقيته !!,,واطق عليهم تتطلع امه تقول اشبك ياولد حمزه طلع من ساعه!.. وانا وياها مطامر وتدوير اعنبو بليسها دبى وسريعه!! عاد انا شايفن بنقالي واقفن حولي وودي اسأله بس مستحي وتجرأت وسألته وقالي اشبك يابويا انا حمزه قلت قل قسم! قال والله قلت تصدق ماعرفتك ياخي صوتك متغير
ونطلع للمطار وحنا مستعجلين وعسانا نلحق على الرحلة وراكبين مع سواق لموزين مهدي وقاعد يتأمل في المرايه قسم بالله ماشال عينه عني ابد هاللي مايخاف الله.وانا وحمزه راكبين ورى تقل كننا ممرضات وخايفين وحمزه حاطن السجاده على سجه عشان ماتبين المفاتن!,,, وعلى هالحال الين وصلنا للمطار ونزلنا هالداشر وقال مع السلامه ياخلو!! وركبنا الطياره وحنا مستانسين وتغمرنا البهجه والفرحه وحمزه كل شوي يقلد صوت الضفدع يقالك منسم ووسيع صدر وانا اقلد البومه وقاعدين نطامر على درجة الطياره ونضحك الين عاد هاوشتنا المضيفه وقعدنا في كراسينا ولعد تحركنا ابدن...واقلعت الطياره ولله الحمد بنجاح وكل شوي يقول لي حمزه شوف هذيك حلوه وانا واثق قلت ياخي لاتستعجل بتلقى ازين في ذاك عندهم كلشن ممنوع عندنا قال يعني اقدر اشرب دخان هناك! قلت تشرب اللي تبي وانا اخوك حتى لو معسل (من دلهم على البحرين؟) وانا اسولف مع حمزه ومستانسين نغزني بطني ومير اقوم للدوره وانتم بكرامه الله مير يصلحكم واخلص حاجتي وارجع لمقعدي

وانا راجع شفت مصري يقرى كاتب وصلعته تلمع تقل كنها مقفى بزر وجازت لي والله وبحركه لا اراديه صفقه على صلعته! , عاد هوارتاع مسيكين واتنفض وطاح مغمي عليه ,,الناس يانظرون فيني بتعجب وانا موقفي يحبه قلبك وش ذا اللي مزحه جفس ؟!,,واقوم استخدم حركاتي وتصريفات(من باب الثقه) والقط مفاتيحي من مخباي واغطي الميداليه عشان مايبين شعار النصر واطلع طرف راس مفتاح الميتين ال ! واقول الطياره مختطفه لحد يتحرك!
قامو يصارخوون الرجاجيل والحريم طافحات! وعمت الفوضى في الطياره ,ويقوم حمزه يقول والله اني شاك فيك من زمان من نظراتك حاس انك ناوي تسوي بلوى واروح لمه وانشب خشته في قزازت الطياره واقوله اصكت ولاخليتك رهينه قالي ماتقدر ياولد هيله قلت اوريك هالحين واسحبه للمطبخ والفعه بالتاوه على خشته واقول طععععع عشان يحسبونه بندق ويغمى على حمزه,,ويصارخووون اللي في الطياره وانا طالع اضحك وامسح يديني بالفوطه واقولهم اللي يبي يصير مثله ترانا في الخدمه, ويقعدون في اماكنهم و لعد سمعت لهم صوت,,وقمت اسوي جوله عليهم وانا مطلع طرف المفتاح واناظر البنيات خايفات وتجتني افكار شيطانيه بس تعوذت من ابليس وقلت في نفسي تراها ترقيع بس و بعد شوي بقول لعبت عليكم يالمخفات
بس كنها كبرت في راسي شوي!!..
واطلع لغرفه السواق حق الطياره وامسكه مع راسه واقوله اطعس وهو يدوس بنزين واقوله ادعسس وهو يدوس (حركه اضطهاديه) عشان اخوفه المهم واصكه على علباه واقوله وين امبير تانكي البنزين ويقول هذا والقاه على الربع قلت له يودي لفرنسا قال أيه بس مايرجع قلت اوكي اطلع لفرنسا واتجه لبرج ايفل واصدم فيه بس انتبه نموت. وقام يتراجف السواق (مدري ليش؟),, واسأله سوال ابنسيه الموت ووسع صدره قلت له كم تعبون فل لطيارتكم قال الحكومه اللي تعبي قلت ماشا الله.. الله يعز الحكومه(خوش ارهابي!)
وانا اتفرج على قير الطياره جاهم اتصال من فرنسا ويقولي السواق معك جاك شيراك يبيكقلت قله مشغول خله يدق بعد خمس دقايق(العن الثقل ياشيخ!!)
وارجع اناظر القير حق الطياره واتأمل ثانيه واقول في نفسي لو انه في الميتين ال كان والله لاأقوم على هايلوكس صويلح ,, ويدق جاك شيراك ثانيه
وارد عليه واقوله وش تبي انت ووجهك قال تكفى ياللحية الغانمه انا داخلن على الله ثم عليك شف غيرنا وش سوينا لكم حنا دايمن مع العرب والمسلمين وننصركم في كل محفل قلت بلاك ماتدري انت ووجهك قال تعوذ من ابليس ورح لندن ترى عندهم عماير يحبها قلبك وانا خوك قلت لا لا هين جايكم جياكم وخرو بس اللي تحت البرج عشان مايموتون(الارهاب شرق وهو غرب!)
وماكملت يموتون الا ويجي حمزه ويصكني على هامتي من ورى هالغدار وادوخ وقمت اهذري واحبحب القير من الروعه واطيح على الارض مدري وش السالفه وادلي ازبد وتطيح المفاتيح ويبين كلش حتى شعار النصر ..
ويربطوني ويشيلوني وكل من مر علي تفل في وجهي بالذات هالمصري اللي اغمى عليه جعله يموت

ويحبحبون في حمزه رفيزي ويقولون والله انك جريه ياشيخ وهو مبسوط الله ياخذه والبنات يطبطبون عليه ,,الين وصلو للبحرين وسلموني للامن الدولي وحمزه طارو به وخلووه بطل همام لا يرضى بالتطرف ابدا وماغير لقاءات ومكافأات حتى قبيلته سوو له تكريم خاص غنى فيها ابوبكر سالم,, ومحاتسيكم في غواتنامو مع يماني في شبكن واحد!

هذي نهايت الثقه الزايده وعدم استدراك العواقب..واللي واثقن في نفسه بزوود...ياراجعنا في العياده وهذا كرتي <<

ملطووووووووش

دفوووووووووش:he12kl: