يسلموووو على القصة ورود

تحياتي

العفو اخوي قولد

دمت بود

في الجامعه وفي اول يوم دراسي اظطرت فيه شما للذهاب رغماً عنها بعد ان منعتها والدتها من الغياب..تمشي شما في ردهات الجامعه..تحمل حاجياتها في يدها...وفي احد الممرات تقابل احدى البنات اللواتي جمعتهن محاضراتٌ واحده...
سارة: هلا شمووه شحالج...
شما: يا هلا والله بخير الحمد لله شحالج انتي...
سارة: بخير يعلج الخير ....شو كانت الاجازه وياج...؟؟؟
شما: انا اخر بنت تسألينها عن الاجازه في العالم...لاني اقل بنت تطلع من البيت....
سارة: يا حليلج والله...بس اقول وايد احلويتي ليكون انخطبتي بس...
شما: هههههههه تسلمين والله ...بس أي خطبه واي خرابيط يا حظي ......
سارة: اقول بسير عنج شمووه..... ربيعتي صفيه تترياني في الكفتيريا...
تجر شما خطاها في الممرات لتصل الى ال student serves وهو المكان الذي سوف تستلم منه جدولها للفصل الجديد..اخذت شما جدولها وذهبت لاقرب هاتف عمومي ..واتصلت بالبيت لتخبر امها بان ترسل السائق مع الخادمه ليوصلها للمنزل...
عادت شما للمنزل في الساعه الواحده ظهراً ..وتوجهت نحو غرفتها...ورن الهاتف...ثم ردت عليه..
شما: الو مرحبا..
خالد: بسم الله متى ييتي....اقول شمووه شحالج..
شما: زفت توني راده من الجامعه..اكيد تبي امي....
خالد: لا والله ابي حمدوووه....
شما: زين اصبر بزقرها ...
صعدت شما للاعلى ومرت على غرفة حمده ولم تجدها ومن ثم ذهبت لغرفة نوره التي لم تجدها ايضاً ..وبينها وبين نفسها" والله توني راده ما فيني ادور على حد...خله الا هو خالد يوم يمل من كثر ما ينتظر بيبند لروحه..بسير ارقد وارتاح ابرك لي.."
....................
وفي شركة ابو هزاع...يدندن خالد في مكتبه..وتدخل عليه احدى الموظفات..تحمل بيدها ملفات ومعاملات العمال...
الموظفه: مرحبا سيد خالد...
خالد وهو يقرا في احدى الملفات من دون ان يرفع رأسه ويرى من الذي دخل...: هلا هلا..حطي الملفات وظهري ..عند شغل وايد...
الموظفه: ان شاء الله تؤمرني بشي ثاني سيد خالد...
خالد: لا لا سيري خلاص....
ويتمتم بينه وبين نفسه" شف هاي شمووه والله لراويها...من متى قلت لها تنادي حمدووه..ولبستني عالخط ولا كن حد طلب منها شي...." ...يرفع خالد سماعة الهاتف.....
خالد: مرحبا ابويه..
ابو هزاع: هلا خالد هاه شعندك ...
خالد: لا والله ما شي بس بغيت اييك المكتب بترخص ...
ابو هزاع : ليش وين ساير...
خالد: يوم بييك بقولك انا وين ساير..
ابو هزاع:زين تعال بس بسرعه عندي شغل ومب متفيج للكلام الزايد...
.....................
في المنزل .......
هزاع: يمه .....يمه...وين سارت امي ...؟؟؟
حمده: لبيه يا هزاع...شفيك تزاعج....
هزاع: حلفي انتي بس ..انا ما قلت حمدووه انا قلت يمه...انتي امي...
حمده: والله يزاتي اللي ما ابيك تم جي تنادي لروحك بس مب منك...
هزاع: بسج عاد والله واصل حدي وين امي...
حمده: داخل تصلي...تبيني اقول لها شي...
هزاع : انا بسير لها...
تظهر ام هزاع من غرفتها ولا زالت ترتدي ملابس الصلاه....
ام هزاع: هاه يا هزاع بلاك تصارخ...
هزاع يقبل رأس امه : ما شي بس كنت بقولج انا ساير بيت عمي بسيير اييب حصووه وفطامي تولهت عليهن...
ام هزاع: والحين كل هالصريخ عسب تقولي انك ظاهر تييب حصه...
هزاع: افا يمه...تبيني اسير هناك ولا اخبرج...انا لازم اخبرج بكل تحركاتي...
ام هزاع: من متى...؟؟؟ ما حيدك تخبرني بكل شي.....شو صار لك اكيد تبي شي ....
هزاع: لا فديتج يمه..انا بترخص الحين ...اريد ارد البيت والاقي ريحة الدخون شالتنه... حصووه راده وعندي لكم خبر بمليووون درهم...
...............
وفي السياره وعلى طريق العوده...
حصه: والله تولهنا عليك ...يا هزاع اربعة ايام جنها اربع شهور...
هزاع: والله البيت بدونكم ما يسوى ...افتقدت فطامي مووت...
تسكت حصه وتصد بوجهها نحو نافذة السياره...وتتنهد......
هزاع: بلاج حصووه ليكون زعلتي...على فكره هاليومين ما ادري شو بلاج وايد صرتي تتحسسين..ليكون بس تغارين من فطامي بنتج...
حصه:..................
هزاع: ردي علي ....
ويسود صمت في السياره بينما...فاطمه ابنتهما ترقد بهدوء في المقعد الخلفي....يرفع هزاع يده ليضع احد الاشرطه المكدسه في سيارته....بحثاً عن اغنية معينه....
هزاع: اقول حصه سمعي هالاغنيه عدل اهداء لج يالزعوله....
حصه: انا مب زعلانه بس انت صاير وايد تتعمد تطريهم اكثر عني...انت مب هزاع اللي انا اعرفه..
هزاع: ههههههههه عيل منو...؟؟؟ والله اني هزاع بلحمه...بس بدون شحم.....
حصه: والله انك متفيج تستهبل....
هزاع: سكتي سكتي الحين سمعي الاغنيه عدل....
وفي هذه الاثناء" آآآآآموت انا في حبهم وارخص انا عيوني لهم ناس اسكنوا قلبي انا وانا سكنت بقلبهم ...هم علموا قلبي الغرام والشوق كله والهيام ...هم من بد كل الانام..ما طيق لحظه بعدهم..."

حصه بفرح: يعلني فداك يا هزاع....لا خلاني الرب منك...
هزاع: بشو تذكرج هالاغنيه....ولا نسيتي..؟؟؟!!!
حصه: كيف انسى ...والله عمري ما انسى هذيك الايام....تحيد والله يوم دقيت لي واهديتني اياها ..تميت اصيح ما قدرت امسك عمري...بس الحمدلله رديت لي...
هزاع: هههههههههه من شو تصيحين...؟؟خلاص وعد الحين عمري ما بسافر بلياج...لازم تكونين وياي...
حصه : بسرعه وصلنا...
هزاع : يالله نزلي بشوي شوي ...وانا بشل فطامي وخلينا نروح نفاجأهم....
........................
يدخل خالد المكتب على والده ...
خالد: هلا ابويه..
ابو هزاع: هاه يالله خلصني وين تبي تسير...ياللي مشاويرك ما تخلص....؟؟؟
خالد: بسير الامارات للكمبيوتر...ابي اشتري لي تلفون ...ما حنيت لحالي عنبو...استوى لي اسبوع اوعد عمري بسير وبسير...
ابو هزاع: خلاص سير حشرتنا...بس بترد ولا بتسير البيت عقب...؟؟
خالد: لا ابوي بسير البيت...ما بقت غير نص ساعه ويخلص الدوام...
ابو هزاع: في وداعة الرحمن..
............................
وفي البيت...ينزل هزاع نحو الصاله...وتتجه خلفه حصه...بينما فاطمه تركض نحو جدتها التي افتقدت تدليلها منذ فتره قصيره...تذهب حصه مباشرة الى خالتها لتسلم عليها...بينما تنزل حمده ...لتنضم اليهم......ويدخل ابو هزاع....ليلتم شمل الاسره...
ابو هزاع: انا بسير احط راسي شوي والله اني هلكان من الشغل....
ام هزاع: يعطيك العافيه....هيه والله من حقك يا بو هزاع سير ارتاح لك شوي....
هزاع: لا يا بويه اصبر شوي ما تبي تسمع الخبر السعيد....
حصه: الظاهر عمي ما يبي يستناس ويانا اليوم...
ابو هزاع: افا والله عندكم اخبار ولا تبون تبشرونا .....يالله مب ساير لين ما تقولي يا هزاع...
هزاع: باركولي انا وحصوه .....
ام هزاع تبتسم وكأنها قد فهمت ما يدور.....توردت خدود...حصه .....ثم فهم الجميع ما هو الخبر السعيد...اخيرا بعد انتظار ثلاث سنين .....
ام هزاع: مبروك يا بنتي والله انا اقول متى بيي هالخبر...
ابو هزاع: مبروك يا هزاع مبروك يا حصه....واخيرا ...ونا اقول فطامي ابطت بدون اخوان...وخوات...
ام هزاع: حسبي الله على بليسكم كبرتوني ...الحين بيقولون شيخه كبرت خلاص ..صار عندها حفيدين.....
حصه: هههههههههههه فديتج يا خالتي....عيل لو انتي جذا تقولين ...شو تقول امايه اللي صارت يده حق 6 احفاد....
ابو هزاع: ماشاء الله عليهم ربي يحفظهم يميع....ابشروا عقب ما نش بييب لكم الحلوان على قولة اخوانا الشاميين....
تأتي حمده بالشاي من المطبخ.....
حمده : مبروك يا حصه وانت يا هزاع...يتربى بعزكم ان شاء الله....
ام هزاع: يا بو هزاع الله يهديك ليكون من صدجك ساير ترقد الحين..ما تشوف الساعه استوت 8 العشا...اتريا لين الساعه..10 وسير ارقد...بعدين بتنش نص الليل وما بييك رقاد....
ابو هزاع: والله راسي مصدع مب قادر اتحمل.....
يبتسم هزاع ويقرب رأسه من زوجته حصه ويهمس بإذنها.....
هزاع بهمس: اقول حصووه شوفي ابوي يتدلع على امي....
حصه تضحك..................
ابو هزاع: شو تقولون والله انكم رمستوا عني...اشوف حصه تطالعني وتضحك.......
هزاع: هههههههههههههه لا يا بويه والله بس جي مستانسين على الخبر....
ابو هزاع: عسى حياتكم دوم يا ولدي افراح وما تشوفون الهم....
حمده : امين يا بويه بوجودك ربي يطول بعمرك....
هزاع: الا اقول انا اترخص بسير فوق ....حصووه يالله قومي....
حصه: شفيك اتريا لين ما يقومون اهلك....
حمده: ههههههههه ما شي مذهب....
ابو هزاع: لا بويه سير براحتك انا والله بشرب لي شاي وبسير احط راسي شوي....
حمده : يمه انا بعد بسير اوعي نوره وشما بعدهن راقدات لين الحين...
ام هزاع: برايكم والله أنا سايره حجرتي....
...............................
في اليوم التالي وفي الجامعه....تذهب شما مع صديقتها....ميثا...للكفتيريا.....يطلبن بعض القهوه......ويتحدثن بضع دقائق مع الموظفه على الكاشير.....
شما: مرحبا عبير شحالج.....
عبير: مرحبا شما كيفك ...هلا ميثا....
ميثا: مرحبا عبووره شحالج عيوني...
عبير: نشكر خير الله ...هاه كيف الاجازه معاكون...
شما: في البيت كالعاده...الا اقول شخبار حمودي......( ابن عبير)
عبير: بيسلم عليكن...
ميثا: يعلني افدى ويهه والله ان يخبل.....متى بتييبينه الجامعه...
عبير : يا ليت بأدر بس والله ما بيصير...انا هون بدي اشتغل طول الوأت يعني ما فيي جيبوا وبعدين مين بيهتم فيه..
شما: افا عليج عيل انتي تتحرين لو يبتيه بتشوفينه....بيكون طول الوقت عندي...
عبير: يسلموا حبيبة ألبي كلك زوووء
ميثا: عبووره نترخص الحين بنسير عندنا شوي بروجكتات نبي نسير المكتبة...
عبير : باي حبيبة ألبي....
شما : باي عبووره...
وفي المكتبة.....تبحث شما مع ميثا عما يستلزمهن من الكتب ....وعندما تنظر شما الى الساعة تراها تشير الى العاشره ....ومن ثم تسرع بلملمة حاجياتها....
شما: يالله ميثا باقي على كلاس ال Islamic عشر دقايق ..يالله ما فينا على حشرته....
ميثا: خيبه تو الناس وين سايره...باقي عشرين دقيقه...عشر من يبدا وعشر عقب ما يبدا...
شما: حلفي انتي بس ...يعني لازم ادخل متأخره...واشوف نظرته هذيك الله تصك القلب...
ميثا: عمى بعين العدو لا تخليني ادعي عليه....اونج الحين تحاتين نظرته...
شما: اففففف من يقدر على لسانج ...ما فيني صراحه انا سايره تبين تيين وياي حياج ما تبين تمي هني....
ميثا: عافانا الله مشكله من ينط العرج....يالله بسير......
......................
في مؤسسات العتيبه يتجول هزاع بحثاً عن سياره جديده....في احد الزوايا يلمح شخصاً كأنه يعرفه.....
هزاع: هلا ومرحبا بو حميد ....عاش من شافك....
عبدالله: هلا والله بهزاع...خييييييييبه من متى مب شايفنك....شحالك....عساك بخير...
هزاع: الله يسلمك...أنت وين كل هالمده...
عبدالله: والله توني راد البلاد من 3 اشهر كنت في بريطانيا..ادرس هندسة طيران...
هزاع: الله عليهم من قدهم الطيارين...المهم الحمد لله على سلامتك...
عبدالله : الله يسلمك يالغالي....الا اقول شتسوي هني...
هزاع: والله ياي ادور لي على سياره يديده...نبي نغير..تعرف لزوم الكشخه...
عبدالله: هيه ادري بك راعي حركات ...وين تبي المزايين هن اللي يربعن صوبك...
هزاع: أي مزايين الله يهديك....صرت ابو وبعدك تبيني اربع ورا البنيات...خلينا الركض ورا البنيات لكم انتوا يا العزابيه...!!!!
عبدالله: ماشاءالله عليك بل بل متى عرست ومتى يبت عيال...
هزاع: بسم الله اذكر الله....غربل الله عدوينك...والله جي من اربع سنين....وانت يالس تربع ورا الشقر انا خذيت بنت عمي....سعيد....
عبدالله: هيه جي عيل....والله تستاهل....الله يوفقك..
هزاع: يميع ان شاء الله...عيل اترخص منك الغالي...بسير اشوف شغلي....
عبدالله : في وداعة الله ...بس اقول عطني رقمك عسب يكون بينا اتصال....
هزاع: افا عليك هاه اندوك بهالكرت...
عبدالله: اش عليك قمنا نوزع كرووت....
هزاع: عيل لو دريت ان الشركه تبي تعيني مدير على المهندسيين اللي فيها بس انا رفضت....قلت لهم ابي اسافر برا...ابي ازيد خبرتي.....
عبدالله: والله شي طيب...
هزاع : تحمل تخبر حد والله حتى حرمتي ما قلت لها...يالله برايك الحين عقب بكمل لك بالتلفون.....
يخرج هزاع من المؤسسه متجهاً نحو الشركه البتروليه التي يعمل بها..ويطلب مقابلة المدير............وينتظر بضع دقائق بالخارج حتى يؤذن له....
هزاع: السلام عليكم..
المدير: وعليكم السلام مرحبا...تفضل يا هزاع...
هزاع: دام فضلك بو احمد....
المدير : شو تشرب شاي ولا قهوه...
هزاع: تسلم دام فضلك...مابي شي مشكور...انا ياي بخصوص موضوع السفر....
المدير : اتريا علينا شوي وعقب سافر...لين ما نييب كم مهندس يكونوا مكانك...
هزاع: والله اني مب قادر كل هاه من وقتي...يعني كل ما ابطيت كل ما فاتني اللي ابي..
المدير : يعني ما شي فايده...
هزاع: اسمحلي طال عمرك هاي فرصتي...كلها 6 شهور وراد لكم........
المدير: الله يوفقك عيل بكتب لك من الحين ترخيص بترك العمل فترة الدراسه...
هزاع: تسلم طال عمرك....
....................
في الجامعه الساعة تشير الى الرابعه والنصف....ميثا وشما عند البوابه ينتظرن السائقين للذهاب للبيت.....
شما: افففف من متى وانا اتريا...متى بيي هذا الله يغربله...
ميثا : بسير شوي الحمام بدق حق عبدالله اخويه...ابطى علي.....
.............
ميثا : الو عبدالله وينك شو هاه ساعه اترياك...
عبدالله: شفيج صبري شوي ساعه وبكون عندج عندي شغل انا بالوكاله...
ميثا: ساعه...!!!؟؟ احلف انت بس ....شو تبيني اخم الجامعه او اصك ليتاتها....واقفل البيبان...الدوام يا بابا يخلص الساعه 5 شو تبيني ايلس اسوي لين خمس ونص....
عبدالله: ما يخصني والله دقي حق سلطان وقولي له ييج...
ميثا: ما ابي تعرف اني انا وسلطان متضاربين مب داقه بس والله لعلم ابويه عليك...جي فارني بالجامعه....
عبدالله: بس ...رمسي لين باجر مب هاد شغلي وياينج من صوب الوكالات في اخر بوظبي لين شارع الدفاع....احلمي ....
ميثا: زين كيف اسير البيت الحين...
عبدالله: اذا ما تبين تتريين سيري ويا حد من ربعاتج....
ميثا: لا والله عقب سعيد بيكسر راسي لو درى....
عبدالله : ما عليج منه دقي لامي وترخصي منها عقب ردي ويا بنت بو هزاع..ناس عرب نعرفهم.....
ميثا: اففففففففففف زين...
.......
شما: ميثوه..انا سايره البيت الحين ...
ميثا: صبري شوي يمكن ارد وياج....
شما: قولي والله ....وناسه...
ميثا: أي وناسه الله يخليج والله لو درى سعيد اخويه بيكسر راسي....
شما : شو فيها عادي والله ترخصي من امج وردي ويانا....انا بظهر اشوف السياره وصلت ولا لاء...
ميثا: اوكي وانا بدق لامايه......
تخرج شما نحو الباب...وتعود مسرعه.....
شما: يالله ميثا وصلت السياره بنظهر الحين....
ميثا: يالله امي وافقت بس عشانها تعرفج والله....اقول شما وصلوني انا اول...
شما: ههههههههه عيل يا غبيه شو تتوقعين مثلا اروح البيت عقب يوصلونج هم...
وعندما خرجن من باب الجامعه ...كانت ميثا رغم حجابها المرتب ...وطريقتها الخاصه في لبس الشيله... كانت لا تغطي وجهها...الا انها كانت فتاة غاية في الحشمة والاحترام...ركبت ميثا السياره في المقعد الخلفي للجهة اليمنى أي على يمين السائق....لكن من الخلف...وبجانبها جلست شما...وعندما تحركت السياره كان الصمت يسود فيها....ولم ترفع ميثا رأسها...خجلاً من السائق....ولم تتكلم ببنس شفه...فيما قطع الصمت تلك الاشاره حين ارتفع صوت احدهم ...قائلاً ..." شما وين بيت ربيعتج"
..........ارتعدت اوصالها ولم تسعفها نفسها لرفع رأسها وانتابها رعب شديد...وحاولت ان تستعيد الطريقه التي تحدث بها ذالك السائق الذي توهمت للمره الاولى بأنه مواطن اماراتي حتى النخاع......وماكادت ترفع رأسها...حتى رأت غطاء رأسه وزيه المحلي ....حينها تأكدت بأنه ليس سائق شما انما هو احد افراد عائلتها...
سرت رجفه في اوصالها...وثم حدثت نفسها قائله..." انا كيف ركبت وياهم...انا شو سويت ..انا لو كنت ادري ان هاه اخوها ولا ابوها تميت اتريا عبدالله لين باجر بالجامعه....يا ويلج يا ميثا شو سويتي....انا كيف ............الحين شو يفيد وانا فاتحه على ويهي ...كيف وبأي ويه الحين اعدل وقايتي واغطي ويهي عقب ما طفنا نص الدرب...اكيد شافني....لا لا...انا مب مصدقه عمري..." وقطع حديثها مع نفسها.....صوت شما.....
شما: ميثا وينج من الصبح ارمسج...وين بيتكم أي شارع...
ميثا بهمس تكاد تسمعه شما: عقب الدوار....خليه يلف من هني....
بينما خالد يتبع شما فيما تصف له الطريق.... توقف للأشاره...وبينما هو ينتظر الاشاره الخضراء ...يحاول تعديل غترته...رفعت ميثا رأسها لتنظر سبب الوقوف...ووقعت عيناها في عينيه في المرآة الأمامية....كادت ميثا...ان تجن وانزلت رأسها وهي تتقطع خجلاً من نفسها.." يا ربي شو هالحاله ...الحين شو بيقولون عني بيقول راكبه ويا ناس غرب ..لا وتطالع بالمرايه..."
" يا زين عيونها هالبنت والله انها جنان.....اففففففففف روعه والله ما شاء الله عليها...." يحدث خالد نفسه واخيرا توقف....
شما: ميثووه بيتكم....
ميثا: م..م..م مشكوره يا شما....
واغلقت باب السياره...بينما نظر خالد للخلف ليتأكد من خلو السياره الا من شما.....
خالد: اقول شما هاي منو من ربيعاتج ليكون ميثا...
شما: هيه وانت ش لك...ليكون تميت تطالعها شرات عوايدك ويا البنيات...
خالد: والله ان ما طالعتها..بس بالصدفه يت عيني بعينها...وانا اعدل سفرتي ...
شما: زين زين استح على ويهك ...جي تسوي أهلها مأمنين علينا بنتهم وانت يالس تطالعها...متى بتستحي على ويهك...
خالد: شمووه سكتي مب متفيج لج والله اني ما طالعتها....جي بالصدفة..يت عيني بعينها...
شما : زين افتح الباب وصلت....
في الحقيقه ان ابناء ابو هزاع كانوا غاية في الجمال سواء كانوا الشباب منهم او الفتيات...وبالاخص هزاع....فارع الطول مفتول العضلات...يميل الى البياض...ذو عينان وساعتان وهذا ما كان يميز جميع ابناء ابو هزاع...ثم يليه جمالاً شما التي تقدم لها الكثير من ابناء عائلتها...ثم خالد الذي كان يزيد جماله....خفة روحه وطيبته وتعاونه..ومن ثم تليهم نوره وحمده....وفي غرفته....يستلقي خالد على فراشه ...يتنهد بعمق....." يا ربي على هذيك العيون والله شلن قلبي....شفيك يا خالد مب جني شايف ملايين البنات...اش معنى هاي انا ما شفت منها غير عيونها...وسوت فيني عيل لو شفت ويها كامل شو يستوي فيني...."
" بووووو.....هههههههه اكيد تروعت...خلووودي بشو تفكر...."
خالد: هلا نوره كيف دشيتي....
نوره : هههههه كيف بعد ..من الباب شو يعني بطف من الدريشه....
خالد: مب جني قفلته..؟؟
نوره: يا عيني الولد يحب...هاه ناسي ...شو ما تعرف اذا مبند الباب ولا لاء.....
خالد: تعالي نوروه هني حذاي...
تقترب نوره من خالد ببراءه ...ثم يمسك يدها ويحاول عصرها....
نوره: خالد أي أي يعور شو فيك....
خالد: انتي شدراج بالحب...
نوره: ههههه ارجوك خالد هد ايديني والله تعورني....
خالد: اش دراج بالحب يالله...رمسي ولا بزيد عليج...
نوره : يمه يمـــــــــــــــــــــــــــــــه ....شوفي خالد...
خالد: سكتي انتي اللي يبتي عمرج للمصيده...قولي شعرفج بالحب...
نوره: ما شي بس جي يقولون في التلفزيون...ووالنت...
خالد: اها زين نوره انا مب مرتاح للنت ...وبقطعه والله ما ييب البلى غيره...
نوره: لا يا خالد ارجوك والله ما عندي شي استانس فيه غير النت....
خالد: لاء ..اول خبريني شو تسوين يوم تدشين النت...
نوره: والله ما شي بس عالماسنجر ويا ربيعاتي...او في المنتدى..وكلهم مؤدبين ما شي فيه رمسه مب عدله....
طرقات خفيفه على الباب....
حمده : خالد انت هني....
خالد: هيه حمدووه تعالي....
حمده: نوره انتي هني وانا ادورج....
نوره: هيه ييت استهبل ويا هالخبل...
حمده: هههههه انتوا الاثنين متفقين لابعد الحدود....
نوره: هيه طبعا انا ما احب حد كثر خلودي يعلني فداه محد يعبرني ويهتم فيني غيره...ويشتري لي كل شي...
خالد باستنكار...: يعني لو ما كنت اشتري لج شي ..واخليج تلعبين بالنت ع ارحتج شو كنتي بتسوين...اكيد بتكرهيني....
نوره : هههههههههههههههههه
حمده: نوره ممكن فديتج تخليني شوي ويا خالدابى ارمسه...
نوره: اوهو...كل شوي تطلعوني برا..انا صرت كبيره خلوني اسمع شو بتقولون ...شو هاه...يوم كنت في صف رابع كنتوا تقولون يوم تصيرين في سادس بنخليج تسولفين ويانا...
والحين انا اول عدادي ولا شفت شي كله خريط...
خالد: افا ما عاش اللي يخرط على نواري...يلسي نواري...
نوره: لا لا ما ابي خلاص انا زعلت...
حمده: نوره فديتج بس ربع ساعه وعقب تعالي...
تظهر نوره وتغلق الباب خلفها...بينما...تعدل حمده من جلستها.....
خالد: هاه حمدوه عسى ماشر...
حمده: خالد انت تعرف ليش انا يايتنك...وتدري كم مره رمسنا بالموضوع ولا حد سمعني...
خالد: ادري...
حمده: خالد محد يروم يقنع هزاع وابويه الا انت...
خالد: فديت روحج يا حمدوه والله ما قصر وياج...بس تعرفين اللي تطلبينه مستحيل...ولو اني موافق ..وابويه وافق هزاع عمره ما بيطيع...
حمده: ارجوك لا تحبطني استوت لي سنه متخرجه..والكل ينغزني برمسه...اذا بنت بو هزاع ما توظفت للحين من بيتوظف عيل......؟؟؟!!؟؟
خالد: ما عليج من رمسة الناس..وخليج وياي...والله يا غناتي البنك شي كبير...وابويه مب مقتنع به...
حمده: بس انا بشتغل في مكان مب مختلط...
خالد: والله ادري...بس الناس يا حمده...شو بيقولون ...يعني خلص الشغل وخلوا اختهم وبنتهم تشتغل بالبنك...
حمده: توك تقول شعلي من رمسة الناس....
خالد: سمعيني فديتج....رمسة الناس في كلتا الحالتين تدمير..يعني جي ولا جي الناس بترمس...لكن انا ما ارضى عليج..والله...
تنهض ببطء.....وتحاول ان تخرج ثم تستدير قليلاً..
حمده: انت اخر حد كنت حاطه املي فيه بس والله يا خالد.....
يقاطعها مسرعاً......
خاالد: لا تقولين اني خيبت ظنج فيني ...والله مب بايدي يا حمدوه...بس وراس بو خليفه اني برمس ابويه بس ما اوعدج بشي...
حمده: فديت روحك يا خالد...كنت اعرف انك ما بتردني...
.......
وعلى طاوله العشاء الجميع موجودون ما عدا شما.....
ابو هزاع: اقول هزاع...
هزاع: لبيه يبه....
ابو هزاع: اليوم سمعت بو سعيد يقول لي رمسه...ان ولده عبدالله قاله له...وبغيت اعرف اذا صدج ولا لاء..
هزاع بتردد: خير ابويه...عسى ما شر...
ام هزاع تنظر بقلق...بينما ترفع حصه بصرها ببطء نحو هزاع...الذي يحاول جاهداً ان يبدو طبيعياً....
ابو هزاع: صدج يا هزاع تبي تسافر....
حصه:..................!!!!
ام هزاع: وين يا هزاع وين...ما يكفي الثلاث سنين اللي قضيتنه برا البلاد...
خالد: يا جماعة الخير صبروا عليه شوي عطوه فرصه يرمس...
هزاع: هيه صدج مسافر...ليش حد بيقول شي وبروحي مسافر بعد...ابي اكمل دراستي ..ابي استفيد وازيد خبرتي ...بصراحه ما حس اني اكتفيت من اللي عندي...
ابو هزاع: لا والله وحرمتك بتيلس هني بروحها....
هزاع: لا مب بروحها بتم هني عندكم...ليش فيها شي...واذا تبي تسير بيت عمي وصولها...وبعدين انا ما بتم هناك الا 6 شهور....انا اتفقت ويا المعهد وخلاص...
حصه:.........!!!!
ام هزاع: الله يكتب لك اللي فيه الخير يا ولدي بس مب جنه مب وقت مناسب وحرمتك حامل...يعني تبيك تكون وياها...
خالد: خلوه هو يعرف مصلحته اكثر واحد...وبعدين كلها 6 شهور بتمر مثل البرق....
ابو هزاع: والله يا هزاع عقلك براسك وتعرف خلاصك...
نوره: اذا بتسافر لا تنسى تييب لي ال Game boy اليديده....وايد حلو ة وشفت منها ويا ربيعاتي بس مب اصليه ..انتي يب لي من امريكا الاصليه ويا الاشرطه مالها....
خالد: هههههههههههه فديت نواري...سيده على الطلبات...ما عندها...لف ولا دوران...المهم نفسها وبس...
ام هزاع: مب منها كله منك يا خلوود...انت اللي معودها على جي...
هزاع يبتسم ابتسامه ليست بالحقيقه ابتسامه انما حاول رسمها بصعوبه....ولم يحاول ان يرفع رأسه او ينظر الى حصه..فقد كان يشعر بقلق..وتردد..وبينه وبين نفسه.." انا ليش سويت جي...ليش ما خبرت حصه...بس والله اني كنت بقول لها...وابويه..الله يهديه ما عرف يرمس جي بيني وبينه...يالله الحين ادري بها بتزعل...والله قلبي ما يقوى على زعلها...ولا بتصدقني...صدج اني غبي ...ِشو اسوي الحين.."
حصه: خالتي انا بسير حجرتي احس اني تعبانه....
ام هزاع: هيه والله فديتج سيري ارتاحي...
هزاع بينه وبين نفسه" يا ربي بدينا..بالتعب من الحين...عيل يوم بسافر شو بتسوي....لا وبعد من شهر..واعدنها ما اسافر الا وياها...يا ربي تعدي هالليله على خير.."
هزاع: يمه انا بسير عند حصه تصبحين على خير...تبين شي فديتج..
ام هزاع: لا فديت روحك...تصبح