سعد آل سعود.....<< المنــــــــادي>>




كم يسعدني ان اضع بين ايديكم طرح يضم احساس رائع...

يضم بعض من اروع ماكتب ...

ملك الحرف... ملك الكلمه... ملك الاحساس..

كم اعشق ماتخطه انامل ذلك الشاعر المبدع ..

وكثيرا ماتعانق احساسي باحساسه...

اترككم لمعانقة تلك الاحاسيس الجميله وتلك المشاعر والكلمات الرائعه


اترككم مع احساس المنـــــــادي

واتمنى ان ينال اختياري استحسانكم ويرضي ذائقتكم...


_________________


تشوفها صدفه وانا اشوفها غير
انا تصنعت الصدف لاجل اشوفك

ماتتعب المشتاق كثر المشاوير
لا صافحت لهفة كفوفه كفوفك

لاجاك قلبي واشتياقي مسايير
ارجوك تكرم بالمحبه ضيوفك

مابي وعد خل الوعد للمقادير
لو اضمنك وشلون بضمن ظروفك

غيبتك طالت ياعسى مانعك خير
الله يطمن خوف قلبي وخوفك

ماقلت لك وقت انتظارك وش يصير
بس اكتب اسمك واتهجى حروفك

نسيان حبك لو تناسيت تذكير
انسى حياتي لاطرت لي طيوفك

كان الجفا غلطه وصلك معاذير
لو طال بدروب التجافي وقوفك






___________

أخطيت يوم اني طلبتك حنانك
لاصرت فاقد شي وشلون تعطيه

مهما نطق لي بالمشاعر لسانك
شي بدون احساس ماقتنع فيه

احساسك المصنوع خنته وخانك
جاملتني به وانت تجهل معانيه

مني نصيحة تنفعك في زمانك
الا شعورك لاتبيعه وتشريه

كانك تقدر قيمة الحب كانك
اللي يودك لاتحاول تعنيه

ياكثر ماحبك فؤادي وصانك
مع كثر ماتبعده كنك تناديه

غيرك امانه خوف والخوف امانك
ماكل من راعاك تقدر تراعيه

حتى ولو عليت بالقلب شانك
ابقى يتيم الحب جرحي اقاسيه

اعذرك لاحطيت نفسي مكانك
لاصرت فاقد شي وشلون تعطيه








______________


انا ماعيش معك الحب اعيش الحب كله فيك
انا وان كنت عنك بعيد لاكن معك واحيابك

تعيش بكل احاسيسي وتفكيري واعيش اغليك
تحسد الحب لو تسمع حديث الروح بغيابك

تزاحم في الخفوق قلوب يسري نبضها بيديك
انا كيف اختصر فيك الشعور بحضرة احبابك

سكنت ارض الغياب وكل سيره للوفاء ترويك
عيونك موطن وغربه عيونك موطن اغرابك

احبك لو تسافر بي على درب التعب وامشيك
حبيبي في زمان البعد قلبي اصدق اصحابك

احبك جرح مايبرى عسى بعض الالم يرضيك
ولون بالرضى عيني واسيل دمعة عتابك

حبيبي في ظلام الشوق كل النور ما يضويك
انا صفحاتك البيضاء انا اصدق حرف بكتابك

فرشت العمر لايامك اسابق ليلتي واجيك
وعرفت ان الغلا خطوه وانا واقف على بابك

جنون الغيم لو تمطر دريت ان الثرى ضاميك
ودريت اني بلا موعد زرعت الحلم بأهدابك..













http://www.mlfk.net/download/48324895e4a4c3da5.mp3















تحياتي....

عواصف ندم...