الفديع اخو شالح بن هدلان

يابو ذعار اكفيك لوني لحالي
واصبر على الدنيا وباقي تعبها

وان غَمْ اخوه معثرين العيالي
انا لخُويه سعد عينه عجبها

وان جن مثل مخزمات الجمالي
كم سابق تقزي ونا من سببها

كم خفرة قد حرَّمت للدلالي
لبست سوادٍ عقب لذة طربها

وان جيت لي قفرٍ من النشر خالي
يفرح بي الحواز يوم أقبل بها

افديك يا شالح بحالي ومالي
يا فارس الفرسان مقدم عربها

يا مْتِيِّه ابله بروس المفالي
ياللي حميت حدودها يا جنبها

رد شالح بن هدلان


لاواخوٍلي عقب فرقاه باضيع
كني بما يجري على العمر داري

اخوي ياستر البنيّ المفاريع
ومطلق لسان اليّ باهلها تماري

ليته عصاني مرة قال ما طيع
كود اني أصبر يوم تجري الجواري

انا اشهد إنه لي سريع المنافيع
عبد مليك لي ولاني يشاري

تشهد عليه مناتلات المصاريع
واعداه من كفه تشوف العزاري

يمناه تنثر من دماهم قراطيع
وعوق العديم اللي بِدَمَّه يثاري

جداع سفرين الوجيه المداريع
مخَلِّي سروج الخيل منهم عواري

القلب ماينسى بعيد المناويع
ليث على صيد المشاهير ضاري

أخذت من روحي لروحي نصايـح
ثلاث يرضن النفـوس الضياقـي

جمع الحطب ومعلقـات الذبايـح
وحذف النشاما للغتر والطواقـي

بقفرٍ خلا عشبه بالأزهـار فايـح
غصن الخزاما له بالآخر مراقـي

تلقى أم سالم به تجـر النوايـح
يطيب مع طير الربيـع التلاقـي

بين أربعة جدران مانيـب طايـح
قطع الخرايم جبّرت عظم ساقـي

في نون عيني بارق الوسم لايـح
كن السحاب تسل فيها السناقـي

إن عوّدوا غب المطـر للفلايـح
مانيـب فـلاحٍ يعـدّل سـواقـي

عـوّدت للـي يكسبـن المدايـح
فيهن طرب قلبـي ولـذة مذاقـي

سود البكار المكرمـات المنايـح
هاذي ضوت خلفة والأخرى ملاقي

خلوني أقضي باقي العمر سايـح
مادام للعمـر المطـرّف بواقـي

أمشي تحت غر المزون الروايـح
هذا هواي ورغبتـي واشتياقـي

يرتاح بالي يـوم أودّه وأصايـح
وأبسط فراشي في مبارك نياقـي

أنحاش عن ناسٍ تسوي الفضايح
عاشت بسوء أخلاق كذب ونفاقي

ناسٍ تسـرّد للمشاكـل شرايـح
تثير من بين الأخـوان الشقاقـي

كل الحياة أحلام والعمـر رايـح
طرقي بها الدنيا وغيري طراقي


خلف هذال

مرثيـــــــــــــــــــــــــــــــــه


ياالله دخيلك حاربت عينـي النـوم
عيـت عيونـي نومهـا تهتنيـبـه

ماغير أهوجس ضايق البال مهموم
همم يـودي القلـب وهـم يجيبـه

ساعة بها أجلس وساعة بهـا أقـوم
مابين حزن ويـأس نفسـي كئيبـه

والدمع من عيني على الخد منظـوم
مثل السيول دموع عينـي رهيبـه

على عزيـزٍ راح مانـي بمليـوم
من ودعه غالـي حياتـه صعيبـه

لاصار غالي مثل نايـف ومحشـوم
خوي جنـب وطيبـا مثـل طيبـه

أنا اشهد انه ينبكـي مابهـا علـوم
وما يلام من يبكيه لو شـق جيبـه

رحل أبو سلمان في سبـت مشـؤم
وكـلآ بكـاه ودمعتـه ماتعيـبـه

رحل وهو لازال بالقلـب مرسـوم
منين مـا وجهـت عينـي تجيبـه

ليت العزاء جانا بغيره مـن القـوم
أهون ولـو أن المصيبـة مصيبـه

لاشك كـل شيـا مقـدر ومقسـوم
ولا يأخـذ الإنسـان إلا نصيـبـه

والموت حق وكل نفسٍ لهـا يـوم
ومن أخطته اليـوم باكـر تصيبـه

مادايـم إلا الله ولا غيـره يــدوم
ومصايـب الأيـام ماهـي غريبـه

يا ما خذت قبله عزيزيـن بالكـوم
أقفت بهـم سـود الليالـي مغيبـه

ماغاب نجم ألا كما غابـت نجـوم
طريق حق وكل مؤمـن رضيبـه

يارب عظم أجرمن فيـه محـروم
واجبر عزاء أبـوه وأمـه الحبيبـه

وألهمهم السلوان والصبـر بعـزوم
وكن عونهم على الضروف العصيبه

وتقبله فـي جنـة الخلـد مرحـوم
يـارب ياسامـع دعـاي أستجيبـه

عساه جارأبوي وأمي علـى الـدوم
وأمه وأبـوه وكـل مسلـم قريبـه

ومافيهم بجاهـك شقيـا ومحـروم
منهـم ولا منـا نـهـارا نجيـبـه

في جنة الفردوس بامطـار وغيـوم
وأنهار تجري من تحتهـم عجيبـه

وصلاة ربي عداد ما أوجد أعمـوم
على النبي اللي سكن أرض طيبـه

م

شكرا لاهوب قصيد رائعه